Vonandi fannstu það sem þú varst að leita að

Vegir kvikmyndaskólanema geta verið órannsakanlegir og þræðirnir geta legið víða að útskrift lokinni. Kristín Margrét Kristmannsdóttir, útskrifaðist úr leiklistarnámi Kvikmyndaskólans árið 2010.

Í byrjun árs 2015 landaði Kristín Margrét Kristmannsdóttir útgáfusamningi fyrir barnabók og þessa dagana eru hún önnum kafin við kynningu verksins sem kom út fyrir skemmstu undir nafninu Vikkala Sól. Bókin hefur gengið vel og prýddi m.a. nýlega annað sæti metsölulista barnabóka hjá Eymundsson.

Áhuginn fyrir því að skrifa hefur alltaf verið til staðar. Þetta er eitthvað sem ég þarf að gera, á meðan sumir finna þörf hjá sér t.d til að syngja af hjartans list eða mála, þá skrifa ég, af því ég þarf þess. Á erfitt með að fá fólk með mér í búðir, því ég enda yfirleitt ráfandi um bókabúðir eins og smákrakki í nammibúð og þá helst í barnabókadeildinni. Mér finnst heillandi að nýta ýmindunaraflið í skrif, heimur barnabókanna er eitthvað svo frjáls og án takmarkana.

Þetta er fyrsta bók Kristínar Margrétar og hún segir það sannkölluð forréttindi að fá tækifæri til að sjá drauma sína rætast og fylgja þeim eftir.

Ég geri mér fulla grein fyrir þessu og hef alveg þurft að klípa mig til að átta mig á því að þetta í rauninni að gerast! Að baki þessu stendur þó hörku vinna sem ég hef þurft að leggja allt mitt í.

Kristín Margrét nýtur þess að skapa og sinna listsköpun í fjölbreyttu formi og fæ útrás fyrir hana á ýmsa vegu. Leiklistarbakgrunnur nýtist henni á ýmsa vegu þó þessa stundina sé það sköpun við bókaskrif sem á hug hennar og hjarta.

Allar upplifanir hafa áhrif á skrifin, lífið hefur áhrif á skrifin. Leiklistarnámið hjálpar mér við þætti tengda starfinu, klárlega. Upplestrarnir sem fylgja þessu verða t.d áhrifameiri og skilmerkari og þar nýtist vel það sem ég hef lært.

Eftir útskrift segist Kristín Margrét hafa verið lánsöm varðandi verkefni. Hún fékk tækifæri til þess að spreita sig við flest störf innan kvikmyndageirans, bæði sem leikari, við framleiðslu, leikstjórn og við gervahönnun,

Ég lék í auglýsingum, stuttmyndum og á leiksviði. Leikverkið Völuspá sem sýnt var í Norræna húsinu stendur þar upp úr, en þar steig ég á svið ásamt fjölda hæfileikaríkra leikara og á meðal þeirra voru útskrifaðar leikkonur úr Kvikmyndaskóla Íslands. Undanfarið hef ég fengið tækifæri til þess að spreyta mig sem blaðamaður sem ég hef ansi gaman af. Á milli þess sem ég starfa sem yogakennari sem á hug minn og hjarta og hefur vissulega hjálpað mér að halda fókus þegar maður er með marga bolta á lofti.

Kristín Margrét segist njóta sín best í fjölbreyttu og skapandi starfsumhverfi og því leitast hún eftir að starfa við slík verkefni.

Ég reyni samt að spá ekkert of mikið í hvað verður. Heldur geri mitt besta í því sem ég tekst á við hverju sinni og sé svo hvert það leiðir mig. Það eru spennandi verkefni á vinnuborðinu sem bíða eftir að komast í farveg. En ég reyni eftir bestu getu að doka við og njóta þessa ævintýris sem ég er stödd í núna.

Kvikmyndaskóli Íslands óskar Kristínu Margréti til hamingju með bókina nýju og óskar henni alls góðs í framtíðarverkefnum sínum.

Lífið hefur áhrif á skrifin – Kristín Margrét Kristmannsdóttir útskrifuð úr leiklist gefur út barnabók

Nemendur Kvikmyndaskólans eiga þó nokkrar myndir á RIFF þetta árið

Útskriftarmynd Ólafar Birnu Torfadóttur Síðasta sumar (Last Summer) hlaut nýlega verðlaun sem besta erlenda stuttmyndin (Best comedy/drama foreign short film) á Los Angeles Independent Film Festival Awards en hún útskrifaðist  úr deildinni Handritum/leikstjórn í Kvikmyndaskóla Íslands nú í vor.

Ólöf segist hafa mest unnið við að skrifa síðan hún útskrifaðist í vor.

Ég hef verið að skrifa, bæði vinna í eigin verkefnum en eitthvað fyrir aðra líka.

Myndin byggist á raunverulegum atburðum og sýnir þann súrrealíska heim sem tekur við hjá aðstandendum þegar fjölskyldumeðlimur leggst í djúpt þunglyndi og reynir að fyrirfara sér.

Verðlaun eins og þau sem myndin  Síðasta sumar hlaut í sumar eru mikil hvatneing en hvað e nú framundan hjá Ólöfu Birnu?

Ég held áfram að skrifa og vinna í mínum verkefnum. Nú er ég að leggja lokadrög á umsókn til Kvikmyndamiðstöðvar Íslands,  handritsstyrk að leiknum sjónvarpsþáttum. Þá er ég að hefja framleiðslu að nýrri stuttmynd sem verður tekin upp fyrir jól, auk þess sem ég er að fara að leggjast í mikla heimildarvinnu fyrir stærra verkefni í vetur.

Ólöf Birna hlýtur verðlaun fyrir bestu erlendu stuttmyndina á Independent Film Festival Awards í LA

Guðmundur Snorri Sigurðarson stundar leiklistarnám í Kvikmyndaskóla Íslands en um næstu helgi verður frumsýnd kvikmyndin Snjór og Salóme þar sem hann leikur eitt af aðahlutverkum.

Ég leik Hans, sem er einn vinsælasti rappari Íslands. Hann er einstaklega vitlaus og barnalegur karakter – virðist drifinn áfram af löngun sinni til að sofa hjá öllu sem hreyfist. Svo er það þegar Salóme byrjar að vinna að heimildarmynd um hann að veröld hans hristist upp því hún hefur ekki minnsta áhuga á að sofa hjá honum – og það vekur upp margar óvelkomnar tilfinningar í honum.

Guðmundur Snorri hefur lengi gengið með kvikmyndanámið í maganum.

Ég hef stefnt að kvikmyndagerð síðan ég var 13 ára. 14 ára keypti ég mér vídjókameru og fór að taka upp eiginlega bara allt sem ég gat – gerði sketsa með vinum mínum og tók upp og klippti myndband fyrir árshátíðina í 10 bekk, sem var mjög skemmtilegt. Svo fór ég í Borgarholtsskóla en þar stefndi ég á handritagerð og leikstjórn, mér datt aldrei í hug að verða leikari.

Guðmundur segist hafa valið sér leiklistaráfanga  í Borgarholtsskóla af því hann taldi það vera einfaldar einingar.

En eftir nokkra áfanga, og þá sérstaklega eftir að vinur minn, Sigurður Anton, útskrifaðist og fór að gera allsskonar verkefni upp á eigin spýtur og fá mig til að leika í þeim þá fann ég mig algjörlega í leiklistinni og ákvað að slá til og sækja um í Kvikmyndaskólanum.

Væntingum Guðmundar Snorra til námsins í Kvikmyndaskólanum hefur verið fullnægt að nánast öllu leyti.

Kennararnir eru frábærir og það er eiginlega fáránlegt hvað það er skemmtilegt að eyða hverjum einasta degi í ekkert nema leiklist. Ég mun sakna þess mikið þegar ég útskrifast. Ég er orðinn hálfstressaður.

Og frumsýningarhelgina sem framundan er segir Guðmundur Snorri leggjast afskaplega vel í sig.

Það var ótrúlega gaman þegar Webcam var frumsýnd – að horfa yfir fullan bíósal af fólki, og sjá myndina í fyrsta sinn í gegnum þau, einhvernveginn. Það er ekki til betri tilfinning en að uppskera hlátur, finnst mér persónulega (því ég legg mikið upp úr gamanleik), þannig ef að ég er á skjánnum að reyna að vera fyndinn og fólk hlær, þá hlýnar mér um hjartarætur.

Ég útskrifast núna 20 maí, og eftir það tekur bara alvaran við. Það eru mörg járn í eldinum hvað varðar fleiri kvikmyndir og verkefni, en mig langar mikið að fara að vinna einhversstaðar við margmiðlun.

Guðmundur Snorri bætir við að hann hafi mikinn áhuga á að vinna við klippingar, textun og annað þess háttar.

Þannig að fá vinnu hjá einhverri sjónvarpsstöð við eitthvað svoleiðis væri bara draumur. En ég hef engar áhyggjur af því út af fyrir sig – lífið fer bara nákvæmlega eins og það fer og ég get ekkert gert nema upplifa það.

“Ekki til betri tilfinning en uppskera hlátur” – Guðmundur Snorri með aðalhlutverk í Snjór og Salóme

Til fróðleiks og skemmtunar birtum við næstu daga ávörp rektors og deildarforseta úr lokahefti haustannar og eru það skrif Hilmars Oddsonar sem koma hér fyrst.

 “Að ver´í sambandi við annað fólk er mér lífsnauðsyn” sungu Stuðmenn eitt sinn. Þetta eru auðvitað alkunn sannindi. Og þetta gildir ekki bara um einstaklinga, einnig fyrirtæki og stofnanir. Kvikmyndaskóli íslands á mjög stóra fjölskyldu, ef svo má að orði komast. Fjölskylda okkar samanstendur af eigendum, starfsfólki, kennurum og nemendum. Þeir síðasttöldu skipta auðvitað mestu, enda eru þeir langstærsta fjölskyldugreinin.Nú er það þannig með fjölskyldur í þær er fólk æviráðið. Við sitjum uppi með fjölskylduna okkar, sama hvort okkur líkar betur eða verr. Við skulum gera ráð fyrir að yfirleitt sé það af hinu góða. Fjölskylda KVÍ telur nokkur hundruð manns. Suma hittum við daglega, aðra reglulega og enn aðra mjög sjaldan. En þeir eru samt í fjölskyldunni og það gleður okkur alltaf jafnmikið að fá af þeim fréttir.Við höfum verið að reyna að koma okkur upp margs konar samskiptakerfi til að viðhalda og rækta gömul og ný sambönd. Það hefur gengið allvel og okkur berast nú reglulega fréttir af sigrum og afrekum gamalla nemenda.Vart er gerð sú kvikmynd eða sá sjónvarpsþáttur á Íslandi að áhöfnin sé ekki að stórum hluta (stundum meirihluta) skipuð fyrrverandi (stundum núverandi) nemendum KVÍ. Þannig hefur það verið um alllangt skeið.Á árinu 2016 komu fyrrum nemendur KVÍ að ótal verkefnum:Á annan tug fyrrum nemenda vann við gerð Ófærðar-þáttanna, sem hafa verið að gera garðinn frægan um víðan völl. Okkar fólk hefur verið að setja upp leiksýningar, vinna verðlaun fyrir myndbandagerð, vinna verðlaun í pitchkeppni, keppa um verðlaun og vinna verðlaun á kvikmyndahátiðum (Sprettfiskurinn á Stockfish, RIFF, Skjaldborg og á ýmsum erlendum stuttmyndahátíðum ), vinna Edduverðlaun, hirða öll verðlaun hjá örvarpinu, framleiða nýjar bíómyndir og leikstýra stuttmyndum, leikstýra vinsælum sjónvarpsseríum, fá styrki til kvikmyndagerðar, átt myndir á Nordisk Panorama og unnið til verðlauna fyrir leik í bíómynd. Þetta er töluvert og þetta skiptir allt máli, fyrir viðkomandi einstaklinga, fyrir gamla skólann þeirra og fyrir samfélagið. KVÍ er þjóðþrifastofnun.Við skulum njóta þess nú í útskriftarviku haustannar 2016 að dást af verkum nemenda sem flestir hafa lagt á sig ómælda vinnu, lagt nótt við nýtan dag í að skapa eitthvað eins vel og þeim er unnt. Þau eru ýmist nýbyrjuð að feta sig í straumhörðum elfinum, stödd í honum miðjum eða eru að ná bakkanum hinum megin, þar sem bíður þeirra lífsbaráttan sjálf, erfið, sæt og óvægin,  – í einhverjum tilfellum glæstur ferill.Lifi KVÍ-fjölskyldan.Hilmar Oddsson
Rektor KVÍ

Að vera í sambandi – Ávarp rektors úr lokahefti haustannar Kvikmyndaskólans

Kvikmyndaskóli Íslands óskar landsmönnum gleðilegs nýs árs og þakkar fyrir það liðna.

Árið 2015 hefur verið skólanum, kennurum og nemendum hans  gjöfult og ánægjulegt að fylgjast með því hvernig útskrifaðir nemar hafa enn eitt árið sett mark sitt á íslenska kvikmyndagerð. Það er ætlun skólans að gera enn betur í framtíðinni og er nýfrágenginn þjónustusamningur við menntamálaráðuneytið mikil hvatning til góðra verka. Við lítum því björtum augum til ársins 2016 og hlökkum til að starfa með ykkur áfram að því göfuga verkefni að mennta öflugt kvikmyndagerðarfólk.

Daði Einarsson er útskrifaður frá deild Handrita og Leikstjórnar hjá Kvikmyndaskólanum og höfum við litið við hjá honum áður, en nú var svo sannarlega kominn tími á annað innlit. Það eru spennandi tímar framundan og er Daði stór hluti af framhaldi upptakna á leiknum The Darken, en eins og má lesa á heimasíðu Myrkur Games;
As Myrkur’s lead writer and performance director, it’s Daði’s job to shape The Darken’s story into tangible scenes. From writing scripts to directing actors and cameras, Daði pretty much represents the “cinematic” part of “cinematic experience.”
Við fengum Daða til að segja okkur aðeins frá

Það er rosalega mikill spenningur í gangi, tökur eru að byrja núna í næstu viku og allt fyrirtækið er á fullu í undirbúningi. Við erum að setja upp hljóðeinangrun, panta nýjar græjur og búnað af netinu og á fullu í prufu tökum. Í rauninni er þetta svolítið eins og seinustu dagarnir fyrir tökur á kvikmynd, allt þarf að klárast áður en við hefjumst handa!
Ef við vinnum vinnuna okkar vel þá ættum við að geta tekið upp senurnar í leiknum eins og þetta sé leikrit. Leikararnir gera þetta allt á sama tíma í einni töku, svo setjum við inn myndavélar og lýsingu eftir á. Í augnablikinu er ég að skrifa handritið fyrir næstu sneið leiksins og að reyna að klára að fylla í nokkur hlutverk. Það kemur mér á óvart hversu mikilvægt námið hjá Kvikmyndaskólanum hefur reynst mér þessa seinustu daga. Bæði í gegnum leikara sem ég þekki úr skólanum, en líka að höndla svona stressandi aðstæður! Þetta er í raun bara eins og útskriftarverkefni, nema við erum að gera tölvuleik.Það er næstum því liðið ár síðan ég byrjaði hjá Myrkur, og ég segi þetta alltaf þegar einhver spyr en mér finnst við vera að bæta okkur stanslaust. Ný tæki og tækni, endalausar prufur og það er alltaf eitthvað nýtt og spennandi að skoða uppá skrifstofu.Ég er rosalega spenntur fyrir því að byrja að leikstýra aftur. Ég vona að þetta sé eins og að hjóla og að ég hafi ekki gleymt öllu, því það er liðið alveg ár síðan seinast!

Daði Einarsson, útskrifaður frá Kvikmyndaskólanum, á spennandi tíma framundan

Sveinn Lárus Hjartarson útskrifaðist frá Leiklist vorið 2018 og hér má njóta hans “showreel

Við óskum honum innilega til hamingju og fylgjumst spennt með framtíðinni

Sveinn Lárus Hjartarson, útskrifaður frá Leiklist

Sjálfstæðu listaskólarnir standa saman fyrir kynningarviku þessa vikuna, tilvalið tækifæri til að ná sér í upplýsingar og kynna sér starf hvers skóla fyrir sig. Kvikmyndaskólinn verður með opinn dag á fimmtudaginn 22.febrúar frá kl.13-18.

Þennan dag verður skólinn opinn öllum sem hafa áhuga á að kynna sér starfsemi skólans, það nám sem er í boði í öllum fjórum deildum og fyrir alla þá sem hafa áhuga á skapandi vinnu og kvikmyndagerð.

Nemendur verða að störfum í skólanum frá kl 13:00-16:00 að vinna að mismunandi verkefnum í tímum með kennurum sínum. Valin kvikmyndaverk nemenda frá öllum önnum verða sýndar yfir daginn og útskriftarmyndir verða sýndar í hátíðarsal skólans frá kl 16:00-18:00.

Meðal annars verður hægt að fylgjast með í opnum tímum:

• Framleiðslu
• Myndmáli og meðferð þess
• Heimildamyndagerð
• Myndbreytingu
• Leikur og rödd í kvikmyndum
• Örmyndir og önnur verk
• Útskriftarmyndir

Dagskrá og opnunartíma hvers skóla má finna hér fyrir neðan á Facebook síðum skólanna;

Fyrsti þáttur Fanga var frumsýndur á nýarsdag en þar mátti sjá í hlutverkinu Wiktoria leikkonuna Moniku Ewu Orlowska.

Monika Ewa útskrifaðist úr leiklistardeild Kvikmyndaskóla Íslands vorið 2013 og við fengum hana til að segja lítillega frá þeim verkefnum sem hún hefur verið í frá útskrift.

Auk hlutverksins í Föngum hef ég leikið í nokkrum bíómyndum, þáttunum Ófærð og auglýsingum. En ég ef líka leikið lítillega á sviði því saman settum við, Vanessa Terrazas, Jóhanna Lind Þrastar, Guðrún Bjarna og Sigga Björk, upp Píkusögur í fyrra undir leikstjórn Gunnu Helgu Sváfnis.

Aðspurð segist Monika Ewa námið í Kvikmyndaskólanum hafa nýst sér mjög vel í þessum verkefnum og almennt í að vinna að kvikmyndagerð.

Ég lærði ekki bara leiklist heldur fékk ég góðan grunn í kvikmyndagerð. Ég lærði hvernig þetta allt virkar og hvernig ferlið er frá því að hugmynd fæðist og þar til áhorfendur fá að njóta uppskerunnar, og allt þar á milli.

Hún gerir einnig mikið úr hlutverki þess að mynda ný tengsl gegnum námið í skólanum.

Ef það er eitthvað sem ég get ráðlagt núverandi nemendum, svona fyrir utan það að vinna samviskusamlega, þá er það að vera opin og kynnast eins mörgum og hægt er því þetta er mögulega fólkið sem þið munuð vinna með í framtíðinni. Svo er aldrei að vita, kannski hitti þið bara ástina í lífinu ykkar í skólanum og eignist seinna draumabarnið með henni.

Bætir Monika hlæjandi við en sjálf varð það einmitt hennar reynsla í skólanum.

Ég er nýlega komin úr fæðingarorlofi þannig að næstkomandi ár er ennþá pínu óljóst, sem er samt smá spennandi. Ég er að vinna sjálfstætt að gerð heimildarmyndar. Myndin hefur fengið vinnutitilinn Breiðholtið og eins og nafnið gefur til kynna  um Breiðholtið, eða réttar sagt fólkið sem býr og starfar þar. Mjög áhugaverð vinna sem snertir marga mismunandi þætti. Þannig að ef þið þekkið einhvern áhugaverðan Breiðhylting megi þið alveg setja okkur í samband.

Og skilaboð Moniku til nemenda eða þeirra sem hyggja á nám í Kvikmyndaskóla Íslands eru skýr:

Þú færð nákvæmlega það út úr náminu sem þú leggur í það.

Lærði ekki aðeins leiklist heldur góðan grunn í kvikmyndagerð – Monika Ewa Orlowska leikur í Föngum

Stuttmynd Eyþórs Jóvinssonar sem útskrifaðist úr Kvikmyndaskóla Íslands í desember síðastliðnum er meðal þeirra mynda sem á morgun keppa um Edduverðlaun sem stuttmynd ársins.

Það er fyrst og fremst bara gaman að fá tilnefninguna, það er ákveðið skref og viðurkenning frá bransanum. Hópurinn sem stendur að baki Litlu stund hjá Hansa er að mæta á sína fyrstu Eddu með tilnefningu, svo það er mikill spenningur hjá okkur nýliðunum.

Verðlauaafhending Eddunnar er á morgun en myndina Litla stund hjá Hansa gerði Eyþór meðan hann stundaði nám í Kvikmyndaskólanum.

Þó maður leyfi sér að vera bjartsýnn fyrir sjálfu kvöldinu, þá eru væntingarnar nokkuð hóflegar, enda hinar tvær myndirnar sem ég keppi á móti eru mjög sterkar og hafa sópað til sín verðlaunum.

Eyþór má sannarleg vera stoltur og raunar magnað að fylgjast með upphafi ferils þessa unga kvikmyndagerðarmanns.

Litla stund hjá Hansa er fyrsta myndin úr Kvikmyndaskólanum sem fær tilnefningu í þessum flokki og það er vonandi að þetta verði hvatning fyrir aðra nemendur að senda sín verk inn á komandi Eddur.

Litla stund hjá Hansa eftir Eyþór Jóvinsson keppir til Edduverðlauna á morgun

Welcome to WordPress. This is your first post. Edit or delete it, then start blogging!

Fréttavefurinn Visir.is sagði nýlega frá árshátíðarmyndbandi 3. árs læknanema sem vakið hefur mikla athygli en við eftirgrennslan kom í ljós að atvinnumaður í faginu, menntaður í Kvikmyndaskóla Íslands kom að verkinu.

Hafþór Ingi Garðarsson  útskrifaðist úr Skapandi tækni vorið 2015 en við fengum hann til að segja okkur aðeins frá verkefninu sem margir þekktir einstaklinegar fóru  með mikilvæg hlutverk í, m.a. Arnar Grant, Ívar Guðmundsson að ógleymdum Kára Stefánssyni.

Ég á félaga í læknisfræðinni sem að hringdi í mig og spurði hvort ég hefði áhuga á því að aðstoða við gerð myndbands fyrir þau. Ég hafði séð myndbönd fyrri ára og viðurkenni að ég hafði haft á orði við hann að þar hefði ýmislegt mátt betur fara. Það var kannski þess vegna sem hann talaði við mig og þá þurfti ég að standa við stóru orðin. Við tókum smá fund og mér leist ágætlega á hugmyndirnar þeirra og var líka ánægður að það var svolítill metnaður í þeim.

Hafþór Ingi segir að framleiðslan hafi hafist strax enda tíminn naumur og tökur þurftu því að hefjast fljótlega.

Ég fékk að hafa nokkuð frjálsar hendur og ég var mjög ánægður með það. Ég fékk að gera FLEST sem mig langaði að gera en fyrir lá handrit  sem var nokkuð gott og því auðvelt að vinna með það. Læknanemarnir voru líka mjög vel að sér og komu með margar góðar hugmyndir af römmum og öðru slíku sem endaði í myndbandinu. Þegar maður er orðinn hugmyndasnauður á löngum tökudögum þá þarf maður oft fleiri augu og ég hafði nokkur góð með mér. Ég er nokkuð ánægður með útkomuna þar sem í boði var bara að hafa eina  Canon 700d tökuvél. Eins og gefur að skilja var ekki mikið  budget og því voru enginn ljós eða annað slíkt. Margt hefði mátt betur fara en myndbandið er búið að ná nokkrum vinsældum því verður maður að vera ánægður með það.

Hafþór Ingi segir að kvikmyndagerðin sé oft mikið hark en hann hafi verið heppinn að fá vinnu úti á landi sem barþjónn og því vinni hann viku og fái svo viku frí.

Frívikuna mína reyni ég eftir bestu getu að nýta í kvikmyndagerð. Ég hef fengið nokkur verkefni í gegnum stóru framleiðslufyrirtækinn við t.d. lýsingu, cameru og hljóð í auglýsingum og viðburðum. Maður reynir að taka því sem gefst og segja nei eins sjaldann og hægt er.

Hafþór Ingi segir að rólegu mánuðina noti hann til að  búa sér til verkefni og öðlast hann þannig reynslu t.d. með því að taka að sér brúðkaupsupptökur.

En svo hef ég verið að leika mér að gera litlar mockumentary’s sem að ég opinbera kannski  einn daginn.

Og Hafþór Ingi vonast eftir sem flestum verkefnum og væntanlega mun góður árangur læknamyndbandsins koma honum vel á markaði kvikmyndagerðarfólks þar sem hann hefur nú starfað í um eitt ár.

Ég  er með vonir bundnar við nokkur verkefni sem eru á döfinni.  Fari svo að þau bregðist er ég með önnur verkefni á eftir þeim og ég held mér bara við efnið á meðan og geri mín eigin myndbönd. Ef ekkert skeður þá fæ ég vonandi vinnu hjá læknanemum að ári.

Hafþór Ingi – Maðurinn á bak við faglegt yfirbragð læknanemamyndbandsins

Í tilefni af 25 ára afmælisári Kvikmyndaskóla Íslands munum við á næstunni sýna 25 valin verk útskrifaðra nemenda síðustu ára.

Haustönn 2012
Fyrsta myndin sem við sýnum er stuttmyndin Monika, sem var útskriftarverkefni Guðrúnar Helgu Sváfnisdóttur sem útskrifaðist haustið 2012 frá Leikstjórnar- og framleiðsludeild.

Guðrún Helga segir að námið hafa nýst sér á margan hátt og örvað hana til skapandi verka á mörgum sviðum. Hún hefur haft mikinn áhuga á að leikstýra, þá helst tónlistarmyndböndum, og á því að skrifa handrit, en svo hefur hún einnig leikstýrt í leikhúsi. Hennar helsta hlutvek í dag er móðurhlutverkið, þar sem hún á 9 mánaða gamla dóttur sem er eilíft leikstjórnarverkefni og uppspretta allrar sköpunar segir Guðrún Helga.

MONIKA from Icelandic Film School on Vimeo.

Berglind Róbertsdóttir er einn af útskriftarnemum á vorönn Kvikmyndaskóla Íslands en hún er í hópi þeirra sem segja okkur aðeins frá sinni upplifun á námi skólans.

Stórkostlegt nám. Kennararnir höfðu jafn mikinn áhuga á að kenna mér eins og mér fannst að læra. Ég fékk að kynnast sjálfri mér ótrúlega vel í þessu ferli, einnig kynntist ég frábærum bekkjafélögum og samnemendum. Þessi tvö ár voru allt of fljót að líða, en voru mjög lærdómsrík og skemmtileg.

Þegar Berglind er spurð út í framtíðina segist hún aldrei hafa verið mikið fyrir að hugsa um hana.

Það eina sem ég stefni á er að lifa í núinu, en þetta nám mun hjálpa mér í hverju sem ég tek mér fyrir hendur.  Ég ætla að halda áfram með leiklistina, fara í skóla úti eða ferðast og kynnast listinni um allan heim.

Um eigin styrkleika eru fyrstu viðbrögð Berglindar að fyrir námið hefði hún ekki verið viss hverju svara ætti.

Ég var  rosalega feimin og ekki ánægð með sjálfa mig. En núna veit ég að styrkleikar mínir eru jafn margir og þeir eru fjölbreytir. Það sem mér finnst þó mikilvægast er að ég er jákvæð og læt ekkert brjóta mig niður.

Náttúran og listin í öllu sínu formi er það sem Berglind Róbertsdóttir brennur fyrir og skólinn óskar henni eins og öðrum útskriftarnemum sínum góðs gengis við að sinna sínum eigin hugðarefnum.

Veit núna að styrkleikarnir eru jafn margir og þeir eru fjölbreytir

Arnar Benjamín Kristjánsson útskrifaðist úr Kvikmyndaskóla Íslands vorið 2012 en hann stundaði nám í deildinni Leikstjórn/framleiðslu. 

Arnar hefur  unnið sem tökustaðastjóri og við tökustaðaleit frá útskrift úr kvikmyndaskólanum en á síðustu misserum hefur hann í auknu mæli fært sig yfir í  framleiðslustörf.  Þegar hefur hann framleitt  eina kvikmynd sem er komin út en hann er um þessar mundir með aðra í  eftirvinnslu. Sem „line producer“ hefur Arnar svo unnið að tveimur myndum en í haust eru tímamót framundan þegar hann heldur utan til  MA náms við Met Film School í London. Við fengum Arnar til að segja okkur hvað á daga hans hefur drifið frá útskrift og allt þaðs em framundan er.

Frá útskrift hef ég aðalega verið að vinna með tveimur framleiðslufyrirtækjum, Vintage Pictures og Zik Zak.  Þar hef ég farið í mörg mjög skemmtileg og krefjandi verkefni. Mitt stærsta hingað til hefur verið bandarískir sjónvarpsþættir sem hétu Documentary Now með Bill Hader og Fred Armisen. Það var bæði krefjandi og skemmtilegt að fylgja því eftir.

Arnar fékk einnig tækifæri til að  vinna með Sólveigu Anspach í síðustu myndinni sem hún gerði.

Það var ákaflega mikill heiður og Sólveig var yndislegasti leikstjóri sem ég hef kynnst.  Mest krefjandi verkefnið mitt var samt mynd sem heitir Bokeh. Þar var ég einn í tökustaðadeildinni og við vorum með 55 tökustaði sem þurfti að ná á 27 dögum, t.d. voru á einum degi 4 tökustaðir á Laugarveginum þar sem ég hljóp á milli að undirbúa næsta stað fyrir komu tökuliðsins.

Sem framkvæmdarstjóri í sjónvarpsþáttum starfaði Arnar einnig að gerð þáttarins

Það var eitt það skemmtilegasta verkefni sem ég hef unnið í en ef ég á að nefna það sem ég er hvað stoltastur af er mynd sem ég framleiddi með snillingunum Birgittu og Hlín hjá Vintage Pictures,  A Reykjavík Porno, sem valin var inn á hátíðina í Edinborg 2016. Það þykir frekar mikill heiður.

 
Arnar hefur fært sig í auknu mæli yfir  í framleiðsluhlutverkið – hvers vegna?

Ég vil færa mig meira yfir í framleiðsluhlutverkið því það er það sem ég lærði og það sem mig langar að gera. Ég hef haft gaman af því að vera í tökustaðarstjóra hlutverkinu og hef lært margt á því en mér hefur fundist skemmtilegra að fá að vera á framleiðsluskrifstofunni að undirbúa myndina, vinna náið með leikstjóra og setja saman allt ferlið á bakvið verkið.

Ég hef verið framleiðandi á tveimur feature myndum, ein er tilbúin og var frumsýnd í Edinborg eins og áður sagði, og hin er í eftirvinnslu og verður frumsýnd í haust. Svo hef ég verið line producer á tveimur feature myndum, Pale Star og eistnesku myndinni Love Comes Slowly.   Það hefur verið ákaflega gaman og ég veit að ég er bara rétt að byrja.

Arnar segist  hafa notað vel í starfi sínu það sem hann lærði í Kvikmyndaskóla Ísland.

Kennararnir sem kenndu mér eru allir úr bransanum og því er gott að nýta sér þá þekkingu sem þeir færa fram og taka vel eftir fyrirlestrunum og ábendingunum frá þeim.Námið mitt úr KVÍ kom mér aðeins af stað inn í bransann.  Ef ég hefði ekki farið í nám þar þá hefði ég ekki farið í starfsnám til Zik Zak kvikmynda og kynnst Birgittu, sem hefði svo valdið því að ég væri ekki á sama stað í dag og ég er.

Tengslanetið nefnir Arnar  sem það mikilvægasta við námið.

Ég kynntist þar fullt af fólki sem ég hef svo unnið með á þessum 4 árum, annaðhvort hefur það mælt með mér í vinnu eða ég mælt með því í vinnu.Eftir skólann stofnaði ég líka framleiðslufyrirtækið Fenrir Films ásamt 7 öðrum samnemendum mínum og höfum við verið að byggja það upp síðustu ár.

Hvernig kom það til að Arnar  ákvað nú  að drífa sig út til frekara náms?

Ég er á leið í MA nám við Met Film School sem er rekinn af Met Film framleiðslufyrirtækinu og kenndur í Ealing Studios, sem er elsta kvikmyndaverið í London. Námið er eitt ár og ég er orðinn frekar spenntur að fara. Ég fór í inntökuviðtal og var tjáð að það væru einungis teknir inn 8 – 12 manns í hvern bekk. Daginn eftir fékk ég símtal sem sagði að ég hefði flogið inn og þeir væru hæst ánægðir með að fá mig í nám til sín.

Það sem mér fannst hvað fyndnast var að þeir spurðu af hverju ég væri að fara í nám þegar mér gengi greinilega vel en ég sagði að mig langaði til að fræða mig meira og að maður tapi aldrei á frekari menntun.

Aðalástæðan fyrir því að ég ákvað að fara í nám var að mig langar til að verða framleiðandi og mig langar að geta læra meira um hvernig góður framleiðandi vinnur, þótt ég hafi lært mjög margt af framleiðendunum sem ég hef unnið með í gegnum tíðina sem mun nýtast mér í framtíðinni.

Tengslanetið mikilvægast – Arnar Benjamín á leið í MA nám við Met Film School

Myndin Albatross var frumsýnd í síðasta mánuði en eins og fram hefur komið á Facebook-síðu okkar er Snævar Sölvi Sölvason, höfundur myndarinnar, útskrifaður nemandi úr Handrita- og leikstjórnardeild Kvikmyndaskóla Íslands.

Sölvi Snær leikstýrði myndinni og skrifaði handritið en fleiri nemendur Kvikmyndaskólans eiga þó sinn skerf  í kvikmyndinni Albatross. Logi Ingimarsson, Erla Hrund Halldórsdóttir og Jónína Guðbjörg Guðbjartsdóttir eru útskrifuð eru úr Skapandi tækni en Jónína er raunar einnig útskrifuð úr Leiklist, eins Gunnar Kristinsson en hann leikur burðarhlutverk í Albatross.

Það er ekki heiglum hent að fjármagna gerð kvikmyndar í fullri lengd en framleiðendur Albatross leituðu á náðir velviljaðra gegnum Karolina Fund og náðu settu takmarki til að framleiðslan gæti átt sér stað. Raunar hafa sömu framleiðendur sagt frá því að einnig megi þakka Bolvíkingum fyrir sitt rausnarlega framlag til gerðar Albatross en þar var myndin tekin upp í fyrrasumar.  Framlag þeirra mun m.a. hafa verið í formi gistingar fyrir þá sem störfuðu í tökum fyrir vestan en þar hafa nú sýningar hennar slegið ærlega í gegn og aukasýningum bætt við.

Albatross hefur fengið jákvæða gagnrýni en bæði Morgunblaðið og Poppland á Rás 2  gáfu myndinni 3 1/2 stjörnu. Gagnrýnandi Morgublaðsins, Hjördís Stefánsdóttir sagði í lokaorðum sínum um kvikmyndina:  „Það er mikil kúnst að fá þéttsetinn bíósal til að hlæja í kór en Albatross teyminu tekst það og sannar þar með að flest er hægt með eldmóðsins vilja að vopni.“

Albatross slær í gegn með KVÍ teymi í sínum röðum

Í dag kl. 12.30 verður viðtal við  Hrafnkel Stefánsson á Snapchat Kvikmyndaskóla Íslands.

Hrafnkell er deildarforseti Handrita/Leikstjórnar en fyrir nokkrum dögum sagði hann hér á fréttahluta okkar frá verkefni sínu East by Eleven. Í dag er umræðuefnið hinsvegar deildin sem hann stýrir hér í Kvikmyndaskólanum.

Það verður örugglega áhugavert að heyra hvað Hrafnkell hefur að segja um námið ekki síst fyrir þá sem leita sér að námsleið við Kvikmyndaskóla Íslands fyrir komandi vetur.

Þið finnið skólann á Snapchat undir kvikmyndaskóli.

Hrafnkell ræðir um Handrit/Leikstjórn í dag á Snapchat

Niðurstöður leitar