Vonandi fannstu það sem þú varst að leita að

Myndin Ég tala íslensku með hreim var nýlega valin opnunarmynd á Rúv í ár en í kynningu á myndinni segir að hún  varpi fram skemmtilegri sýn á það hvernig nýjum Íslendingum tekst að aðlagast og tileinka sér íslenska tungu, hver með sínu nefi eða öllu heldur hreim.

Leikstjóri og meðhöfundur myndarinnar heitir Jimmy Salinas og er nemandi í En hann samdi handritið ásamt Juan Camilo Estrada.

Myndin var gert í þeim tilgangi að vekja athygli á hvernig íslenskan er að aðlagast nýrri kynslóð af Íslendingum. Ég til dæmis tilheyri þeim hóp og okkar tilraun var að sýna hvað er það sem felst í að læra þessa tungu sem er ekki léttast að læra.

Aðspurður um Kvikmyndaskóla Íslands segir Jimmy að honum finnist hann frábært fyrirbæri.

Hann býður uppá mikla möguleika og margt sem hægt er að nálgast í gegnum hann og þetta hjálpar manni alveg helling. Kannski nær námið að hjálpa manni beint í öllu saman en það er bara partur af kvikmyndageraferlinu sem maður velur sérí  námi eða störfum.

Námið segir Jimmy algjörlega standast það sem lofað var og þó hann óskaði oft að farið væri enn dýpra ofan í hlutina er það væntanlega nokkuð sem að sinni er skólanum ofviða, þar til rýmkar um fjárveitingar til skólans.

Áður en ég bryjaði í námið bjóst ég við að þetta yrði miklu meira erfiðara en kannski er bara ástæðan að mér finnst þetta svo gaman – námið svo skemmtilegt.

Jimmy segist ekki hafa búið yfir mikilli reynslu beint í kvikmyndagerð áður en hann hóf nám við skólann.

En ég var alinn upp í kringum mikið af listamönnum og fólki í viðskiptum sem höfðu mikil áhrif á mig varðandi visual efni. Ég teiknaði mjög mikið þegar ég var yngri og málaði jafnvel en var líka mjög forvitninn um  myndavélar og þannig byrjaði kvikmyndaferlið.

En hvert er stefnan sett að loknu náminu?

Ég mun halda áfram í námi en ekki beint við kvikmyndagerð. Ég mun samt ekki hætta að skapa kvikmyndaefni. Fyrst er ég að vonast til að byrja að vinna með Rauða krossinum  þar sem við erum að ráðgera ansi spennandi verkefni þar sem fjallað verður um innflytjendur til landsins.

Námið stenst allt sem lofað var – Jimmy Salinas átti opnunarmynd Örvarpsins

Í síðustu viku voru sýnd tvö leikverk  á vegum leiksmiðju leiklistarnema og nemenda í handrita- og leikstjórnardeild Kvikmyndaskóla Íslands.

Verkin voru sýnd í leikhúsi Leikfélags Kópavogshlutu og hlutu heitin Litir Lífsins Eru Látlausir og Langlífar Rósir/Vermix en stjórn leiksmiðjunnar var í höndum Hlínar Agnarsdóttur. Leikstjóri sýningarinnar var Rúnar Guðbrandsson, deildarfoseti leiklistardeildar.

Myndir frá sýningu leiksmiðju Kvikmyndaskólans

Hrafnkell Stefánsson, deildarstjóri Handrita/Leikstjórnar var með skemmtilegt ávarp í útskriftarbæklingi vorannar hjá Kvikmyndaskólanum.

Lokaðu augunum. Hvað sérðu fyrir þér? Álfa og dverga berjast saman gegn illum vættum? Geimfara sem uppgötvar óvænta leyndardóma á tunglinu? Systkini sem uppgötva að fataskápurinn þeirra er dyr að leyndum ævintýraheimi? Dularfullt morð og bitran rannsakanda sem verður að leysa málið?  Misheppnað stefnumót sem virðist engan enda ætla að taka? Eða þögul átök fjölskyldu í matarboði?

Öll höfum við látið hugann reika, leyft ímyndunaraflinu að taka tauminn frá dagsins amstri og leiða okkur inn á nýjar og spennandi slóðir. Þegar við sleppum ímyndunaraflinu lausu og leyfum okkur að njóta barnslegrar gleði sköpunar má með sanni segja að við séum öll höfundar um stund.

Hvort sem um ræðir handritshöfund, leikstjóra eða hvort tveggja undir sama hatti, þá er það þessi barnslega gleði sem leiðir höfundinn áfram í för sinni að umbreyta hugmyndinni sem aðeins hann gat séð áður, hjálpa henni að þroskast og dafna þar til loks stendur eftir heildstætt verk sem aðrir geta fengið að njóta.

Við Handrita- og leikstjórnardeild Kvikmyndaskóla Íslands er megináherslan lögð á höfundinn. Hvort sem hann er hugsuðurinn sem líður best í ímyndunarheimi sínum, leiðtoginn með sýnina eða sitt lítið af hvoru, viljum við gefa næstu kynslóð af höfundum öll þau tól og tæki sem þeir þurfa til að þroskast og dafna sem slíkir. Við viljum metnaðarfulla, hugmyndaríka og vinnusama nemendur inn í skólann og að tveimur árum liðnum sjá þá útskrifast sem sjálfstæða listamenn, færir um að gera hugmyndir sínar að veruleika. Leyfa öðrum að sjá það sem einungis þú gast séð áður.

Á þessum tveimur árum í skólanum læra nemendur að tileinka sér vinnuferla leikstjóra og handritshöfunda og öðlast reynslu með því að leikstýra og skrifa kvikmyndaverk. Samhliða þessu sitja þeir námskeið í öllum helstu undirstöðuatriðum kvikmyndagerðar, þ.á.m. framleiðslu og myndrænni frásögn og fá auk þess grunnkennslu í tækni og tækjanotkun.

Að loknu námi við Handrita- og leikstjórnardeild eiga nemendur að hafa öðlast þann þroska og sjálfsaga til að sitja löngum stundum við handritsskrif. Þeir hafa þá öðlast þá mikilvægu reynslu að hafa séð hugmyndir sínar verða að alvöru verkum sem leikstjórar. Þeir útskrifast því sem reyndir höfundar tilbúnir að takast á við allar þær spennandi áskoranir sem bíða í ört vaxandi kvikmyndiðnaði hér á landi, hvort sem það er við gerð sinna eigin verkefna, störf innan veggja hinna fjölmörgu framleiðslufyrirtækja landsins eða áframhaldandi nám á erlendri grund. Því þegar þú hefur beislað krafta ímyndunaraflsins, standa þér allar dyr opnar.

Lokaðu augunum. Og segðu mér hvað þú sérð.

Deildarforseti Handrita- og leikstjórnardeildar

Lokaðu augunum. Hvað sérðu fyrir þér?  Ávarp Hrafnkels Stefáns í vorbæklingi

Leszek Daszkowski er pólskur nemandi á fyrstu önn Skapandi tækni en auk þess að vera ekki íslenskumælandi glímir hann við heyrnarleysi.
Verkefnin í Skapandi greinum eru ólík en í einu þeirra ætti verkefnaskilin að fela í sér mínútu hljóðskrá þar sem viðfangsefnið er annahvort tilfinning eða atburður. Verkefninu skyldi fylgja viðeigandi ljósmynd og valdi Leszek þemað „snjóflóð“.
Við fengum með aðstoð túlks Leszek til að spjalla við hann um verkefnið og hvernig honum gekk að leysa úr því.

Ég er á tæknideild en markmiðið mitt var aðalega að læra kvikmyndatöku og klipp. Þessi kúrs snýst aðeins um að læra hljóð og mér leist ekkert á það til þess að byrja með. En svo ræddi Óli Fannar deildarforseti tæknideildar við mig og Gísli starfmaður KVÍ sem hefur sérhæft sig í hljóði og í sameiningu ákváðum við að prófa þetta. Ég settist niður með Gísla og hann kenndi mér á þetta allt saman og sýndi mér hvernig forritið virkaði. Ég er líka ánægður að hafa fengið aðstoð túlks því ef ég var eitthvað óöruggur þá spurði ég túlkinn og gat stuðst við hennar tilfinningu fyrir hljóðinu.

Eðlilega fannst Leszek erfiðast við úrlausn verkefnisins að heyra ekki hvað hann var að gera.

En ef það hljómar bassi þá finn ég hann miklu frekar heldur en til dæmis ef um er að ræða samtal tveggja persóna. Við slíkar aðstæður næ ég mjög illa að meta hljóð. Öllum hávaða og miklum bassatón finn ég fyrir. Ég gat líka lagt hendurnar á hátalarann og fundið þannig titringinn.

Leszek segir góðar innihaldslýsingar á hverju hljóði fyrir sig í hljóðsafni skólans hafa nýst vel við vinnslu verkefnisins.

Notkun lýsinganna gerði mér kleyft að velja þau hljóð sem hentuðu mér best við verkefnið og litu vel út á hljóðstyrksmælinum. En aðeins þar sem eitthvað var skráð við hljóðin gat ég ekki nýtt mér þau.

Segir Leszek og bætir við að svo framarlega ekki er um að ræða hljóðvinnslu samtala gæti vel komið til þess að hann vinni slík verkefni aftur.

Ef það eru drunur eða sprengingar þá get ég alveg unnið með það. Ég játa að þegar ég mætti fyrst í fyrsta tímann þá fannst mér þetta ekkert sérlega skemmtilegt. En eftir að Gísli fór að kenna mér á þetta þá byrjaði mér að finnast þetta mjög skemmtilegt.

Gísli fylgdist vel með mér og kom annaðslagið og leiðbeinti mér. Þess á milli vann ég sjálfstætt.
Verkefnið vann Leszek við í heila viku og það er sannarlega magnað að hlusta á afraksturinn hér.

Finn fyrir hávaða og miklum bassatón – Leszek Daszkowski lætur ekkert stöðva sig í úrvinnslu verkefna

Frostbiter hryllingsmynda hátíðin  er um helgina á Akranesi og meðal mynda sem sýndar verða eru þó nokkrar sem gerðar hafa verið af nemendum Kvikmyndaskólans. Hér eru nokkrar í viðbót við þær sem þegar hafa verið taldar upp;

Mr. Renfield, ferðasölumaður, leitar uppi ríkan viðskiptavin sem staddur er í Carfax Abbey. Á meðan fer Dr. Van Helsing af stað í að rannsaka dularfull mannshvörf á sömu slóðum 

Knútur Haukstein Ólafsson, útskrifaður úr Leiklist hjá Kvikmyndaskólanum, leikstýrði ásamt Arnóri Elís Kristjánssyni og Heimi Snæ Sveinssyni.

Myndin segir frá fjórum ungmennum sem leggja af stað í skemmtiferð upp í sumarbústað en á leiðinni lenda þau í óhappi og þá fljótt kárnar gamanið

Ungt par í leit að næturgistingu fer að ráðum heimamanns og leitar sér skjóls á yfirgefnu eyðibíli. Þegar tekur að rökkva þá fer undarleg atburðarás af stað

Daði Einarsson er útskrifaður frá Handrita og leikstjórnar deild

Hér fyrir neðan fylgir dagskrá hátíðarinnar og vonum við að þið njótið vel

Frostbiter kvikmyndahátíð, 10.-12.nóvember

Nemendur á fjórðu önn í Skapandi Tækni eru þessa dagana í óða önn að ljúka tökum á lokaverkefni sínu.

Um er að ræða útskriftarönn nemanna og leit ljósmyndari skólans við og fylgdist með þeim að störfum. Myndirnar eru teknar á setti hjá Sigríði Björk Sigurðardóttur.

Nemendur á fjórðu önn í Skapandi tækni ljúka lokaverkefni

Kvikmyndaskóla Íslands býður upp á tveggja ára leiklistarnám sem nær yfir fjórar annir og hægt er að sækja um bæði á haustönn og vorönn. Við fengum Hlín Agnarsdóttur til að segja okkur frá deildinni sem hún erí forsæti fyrir.

Farið er fram á að umsækjendur hafi stúdentspróf eða yfir 100 einingar úr framhaldsskóla en það er þó ekki algert skilyrði. Við tökum á móti einstaklingum í viðtöl og áheyrnarprufur sem eiga hugsanlega erindi í námið þótt það vanti áðurnefnt undirbúningsnám. Námið fer fram á dagtíma og er full vinna fyrir þann sem hyggst sækja það og jafnvel meira en það.

Aðalnámsgreinarnar segir Hlín stuðla að því að þjálfa helstu tæki leikarans, líkama hans og rödd, hugsun og tilfinningar.

Á hverri önn eru kennd námskeið í leiktúlkun, leiktækni, hreyfingu og dansi, raddbeitingu, textameðferð og söng. Auk þessa fá nemendur á hverri önn sérstakt námskeið í kvikmyndagerð þar sem þeir læra helstu undirstöðuatriði hennar í samvinnu við nemendur í öðrum deildum skólans. Lokaverkefni við skólann er leikin mynd sem leiklistarnemeinn framleiðir og leikur aðalhlutverkið í.

Hlín segir megináherslu námsins vera þá sömu og í öllu öðru leiklistarnámi að því undanskildu að nemendur í Kvikmyndaskóla Íslands læra að leika fyrir kvikmyndir og sjónvarp og vinna með öðrum kvikmyndagerðarmönnum við tökur jafn innan sem utandyra.

Sú þjálfun er geysilega mikilvæg og hvergi annars staðar er hægt að sækja sér þá menntun hér á landi. Margir nemendur sem lokið hafa leiklistarnámi frá Kvikmyndaskóla Íslands skapa og framleiða sínar eigin myndir að námi loknu. Það geta þeir vegna þess að þeir hafa tamið sér vinnubrögð kvikmyndagerðarmannsins.

Engu að síður er ekkert því til fyrirstöðu að útskrifaðir leikarar úr Kvikmyndaskóla Íslands hasli sér völl á leiksviðinu.

Margir nemendur sem eru útskrifaðir af Leiklistarbraut hafa leikið á sviði eða jafnvel haldið áfram námi þar sem áhersla er lögð á sviðsleik. Öll grunnþjálfun leikarans miðast við það að hann nái tökum á þeirri tækni sem þarf til að leika jafnt á sviði sem í kvikmyndum.

Þrátt fyrir sérhæfingu deildarnámsins er námið í deildum Kvikmyndaskólans einnig að hluta til þverfaglegt og eins og Hlín nefndi fyrr í samtalinu leita leikarar oft fanga í öðrum störfum í kvikmyndafaginu.

Námið er vissulega þverfaglegt að því leyti að nemendur fá mjög góða innsýn í kvikmyndagerð og geta því sótt um störf innan kvikmyndaiðnaðarins að námi loknu eða í greinum sem tengjast kvikmyndaiðnaði. Þar má m.a. nefna framleiðslustörf, aðstoðarleikstjórn og jafnvel handritskrif og leikstjórn. Leiklistarnám við Kvikmyndaskóla Íslands undirbýr nemandann ekki aðeins til þess að vera leikari í kvikmyndaiðnaði, heldur gefur honum einstakt tækifæri til að kynna sér fjölbreytileg verksvið allra þeirra sem koma að kvikmyndagerð. Á meðan á náminu stendur kynnast leiklistarnemar öðrum deildum skólans og nemendum þeirra og samstarfsverkefni milli deilda er einn af mikilvægustu þáttunum í náminu og stuðla ekki hvað síst að undirbúningi fyrir þau störf sem bjóðast að námi loknu.

En hvern skyldi Hlín telja vera mesta styrk Kvikmyndaskóla Íslands?

Auk nemendanna eru það úrvals kennarar sem bjóða upp á frábær námskeið sem öll stuðla að því að fjölga verkfærum leikarans. Leikari sem ekki á vel útbúna verkfærakistu kemst ekki langt. En til þess að eignast verkfærin verður hann að vera tilbúinn að leggja mikið á sig í krefjandi námi þar sem einbeiting, agi, úthald og samstarfshæfni eru lykilorð.

“Leikari án verkfærakistu kemst ekki langt ” – Hlín Agnarsdóttir segir frá Leiklistarnámi KVÍ

Viðtal við Ágúst Stefánsson um “Valda”

Mánudagurinn 16. maí verður opinn dagur í Kvikmyndaskóla Íslands og verður öllum velkomið að koma og kynna sér starfsemina í húsnæði skólans að Grensásvegi 1.

Deildarstjórar skólans munu bjóða upp á lifandi kynningar á deildunum sem í boði eru og fyrrverandi nemendur koma í heimsókn og sýna hvað þeir hafa gert eftir útskrift sína úr skólanum. Tækjaleigan kynnir tækin sem nemendur skólans hafa aðgang að og gestum verður leyft að prófa green screen og setja upp ýmis ljós og myndavélar.

Boðið verður upp á kaffihlaðborð  í matsal skólans og í krakkahorninu verður í boði að horfa á kvikmyndir,  lita í litabækur og sitthvað fleira.

Einnig er ætlunin nota opinn dag skólans til  að styrkja fjölskyldu Edvins Martinssonar, fyrrum nemanda við skólan sem nýlega lést og verður það gert með markaði þar sem ýmislegt verður til sölu; föt, DVD-diskar og bækur.

Einnig verður í boði að sjá fyrstu leiknu 360° mynd sem hefur verið tekin upp á Íslandi auk fjölda annarra skemmtilegra hluta sem í boði verða á Opnum degi Kvikmyndaskóla Íslands.

Opinn dagur í Kvikmyndaskólanum – Allt um dagskrána

Dagana 4.-18. ágúst verður WIFT á Íslandi í samstarfi við Kvikmyndaskóla Íslands og RIFF með sumarnámskeið í stuttmyndagerð fyrir stelpur á framhaldsskólaaldri. Þátttakendum verður skipt í tvo aldurshópa, 15-17 ára  og 18-20 ára en námskeiðið er haldið til að bregðast  við skýrslu menntamálaráðherra, úttekt á stöðu kynja og þátttöku í félagslífi framhaldsskólanema.

„Þar kom m.a. fram að myndbandaklúbbar framhaldsskólanna eru í langflestum tilvikum fullskipaðir strákum sem framleiða myndbönd sem eru oftar en ekki mjög karllæg.“ segja þær Ása Helga Hjörleifsdóttir og Dögg Mósesdóttir hjá WIFT og bæta við:

„Við hjá WIFT teljum að þetta sé undirrót þess mikla kynjahalla sem hefur ríkt í íslenskri kvikmyndagerð og höfum þess vegna ákveðið að leggja sérstaka áherslu á stelpur í þessum aldurshóp.“

Hægt er að skrá sig fram að fyrsta degi námskeiðsins og enn eru nokkur pláss laus. Þátttakendum verður skipt í tvo aldurshópa eins og áður segir, stelpur fæddar 1998-2000 annarsvegar og hinsvegar þær sem fæddar eru 1995-1997.

„Á námskeiðinu eru kennd undirstöðuatriði kvikmyndagerðar og því lýkur með gerð stuttmyndar“

Þannig munu  allir þáttakendur í lok námskeiðsins hafa tekið þátt í að skrifa, framleiða, leikstýra, skjóta og klippa eina stuttmynd.  Myndirnar verða svo sýndar við hátíðlega athöfn á RIFF í haust en RIFF verður með sambærilegt námskeið á hátíðinni fyrir stelpur á grunnskólaaldri. Sumarnámskeiðið verður haldið í húsakynnum Kvikmyndaskóla Íslands að Grensásvegi 1 og eru kennarar kvikmyndagerðarkonurnar Ása Helga Hjörleifsdóttir og Dögg Mósesdóttir.

Námskeiðið skiptist í eftirfarandi kennslustundir/daga:

ágúst: Handritsgerð og myndræn frásögn

ágúst: Kennsla á myndavélar / tæknilegur undirbúningur fyrir tökur

11.12., og 13. ágúst:      Tökur á stuttmyndum

14., 17. og 18. ágúst:     Klipping og önnur eftirvinnsla

Yngri hópurinn er fyrir hádegi og eldri hópurinn er eftir hádegi en námskeiðið kostar 20.000 krónur.

Stuttmyndagerð fyrir stelpur á framhaldsskólaaldri. 4-18. ágúst

Rúnar Guðbrandsson er deildarstjóri leiklistardeildar Kvikmyndaskólans en hér er að finna ávarp hans úr lokahefti haustannar skólans.

Kvikmyndaskóli Íslands býður upp á tveggja ára nám fyrir leikara með sérstaka áherslu á kvikmyndaleik. Grunnurinn er lagður með kraftmikilli þjálfun í tækni leikarans, – sjálfu handverkinu; líkamsþjálfun sem eflir styrk, sveigjanleika og skerpir líkamsmeðvitund, – raddþjálfun, hjóðmótun og söng. Síðan færist áherslan yfir á leiktúlkun og sköpun.

Sérstaða námsins er þó sú áhersla sem lögð er á kvikmyndaleik.

Nemendur fá mikla og góða innsýn í heim kvikmyndagerðar, list hennar og tækni, enda hæg heimatökin í skólanum. Námið er verkefna og framleiðslutengt og nemendur hljóta víðtæka þjálfun í að leika í kvikmyndum og öðrum myndmiðlum í hópvinnu með öðrum deildum skólans. Auk þjálfunar í kvikmyndaleik kynnast nemendur handritsgerð, framleiðslu, kvikmyndatöku, hljóðvinnslu, klipp og eftirvinnslu.

Nemendur fá tækifæri til að blómstra og dafna í skapandi og ögrandi umhverfi sem jafnframt veitir þeim öryggi, aukið sjálfstraust og sterkari sjálfsmynd á sviði listgreinarinnar.

List leikarans felst í því að gera hið ósýnilega sýnilegt, – að holdgera hugsanir og tilfinningar og gefa þeim sýnilegt form, – meitla þær í tíma og rými.  Að blása lífi í orð af blaði og gefa þeim hljóm. Að miðla skáldskap sem á einn eða annan hátt sýnir okkur líf og hlutskipti mannsins á jörðinni. Viðfangsefni leikarans eru mannleg tilvera í öllu sínu veldi:  innra og ytra líf manneskjunnar, samskipti við aðra menn og samfélag. Leikarinn leiðir okkur inn í hugsanir og tilfinningar manneskjunnar og birtir okkur hegðun hennar. Það er sérhæfð list leikarans sem skapar töfrana sem hrífa okkur, hvort heldur er á leiksviði eða í kvikmyndum.

Til þess að leikarinn geti tekist á við þessi flóknu viðfangsefni þarfnast hann þjálfunar, þar sem hæfileikar hans og persónuleiki eru í aðalhlutverki en líkami og rödd aðalverkfærin.

Til að tryggja að nemendur fái sem besta þjálfun sækir skólinn kennara úr röðum sérfræðinga á hverju sviði fyrir sig sem allir eru virkir í samfélagi listanna. Þeir koma úr röðum leikara, leikstjóra, söngvara, dansara, handritshöfunda og kvikmyndagerðarmanna. Saman vinna þeir að því að undirbúa nemendur til þátttöku í listgreininni að námi loknu eða fyrir framhaldsnám á einhverju sviði listgreinarinnar.

Leiklistardeild Kvikmyndaskóla Íslands er því ákjósanlegur valkostur fyrir ungt og hæfileikaríkt fólk sem hefur áhuga á skapandi og krefjandi námi á sviði leiklistar og kvikmyndagerðar.

Leiklistardeildin er krefjandi tveggja ára nám og markmiðið er að nemendur fái að blómstra og dafna í skapandi og öruggu umhverfi.

Áherslan á kvikmyndaleik – Rúnar Guðbrandsson, deildarstjóri leiklistardeildar

Svanur Pálsson, nýútskrifaður úr leiklistardeild Kvikmyndaskóla Íslands segir okkur frá náminu og hvað honum finnst það hafa gert fyrir sig.

Heilt á litið var tíminn fljótur  að líða í náminu, en ég útskrifaðist með þekkingu sem ég mun svo sannarlega nýta mér í framtíðinni. Ég fékk mikla innsýn inn í listina sem liggur á bakvið kvikmyndagerð og mikilvægi samvinnu. Listaverkið kvikmynd er sem mjög ﬂókið málverk, margir misþykkir penslavopnaðir málarar mála á misstóran striga.

Svanur segir að Kvikmyndaskólinn hafi  að geyma mjög gott starfsfólk sem sjái manni fyrir fjölbreytilegu og fræðandi námi.

Ég fékk að kynnast listsköpun á ýmsum sviðum, lagði fyrir mig leiklistarnám og fékk að skyggjast inn í hugfangandi heim leiktækninnar, raddarinnar, líkamans og listasögunnar sem kom okkur hingað. En ég tók með mér miklar tækniframfarir í eftirvinnslu og lærði uppbyggingu á söguformum kvikmynda sem smitast inn í allt annað. Það er frábært og auðvelt að læra í hverri af deildum KVÍ ef maður gefur því smá ást.

Svanur  vonast til að ná að þróast áfram sem leikari og ná framförum í sínum helstu veikleikum. Þaðan segir hann alla vegi  mögulega enda sé hann að vestan.  En ef hann vill takast á við veikleika sína, hverjir eru þá helstu styrkleikarnir?

Að geta skoðað hlutina frá sjónarhorni annarra. Listin er eins og töfraheimur þar sem ótrúlegir hlutir gerast, það að geta slakað á í augnablikinu er einn eiginleiki sem ég hef þróað með mér í náminu og held áfram að vinna með ásamt öðru.Mér hefur alltaf þótt auðvelt að mæta fólki með réttvísi og vera þakklátur fyrir allt sem er.

Svanur bætir við að það sé  margt sem hreyﬁ við sér.

Ef ekki allt sem ég veit, knattspyrna, pólitík, hið veraldlega, hið andlega, listsköpun, manneskjur og helstu menningarkimar samfélagsins sem er einn þyrnafullur en jafnframt blómlegur garður.

“\u00datskrifa\u00f0ist me\u00f0 \u00feekkingu sem \u00e9g mun svo sannarlega n\u00fdta m\u00e9r”

Erlendur Sveinsson vann nýlega til verðlauna sem besta mínútmynd fyrir stuttmyndina Breathe á kvikmyndahátíðinni Urban Tv Festival í Madrid á Spáni. Áður hafði myndin sigrað í sama flokki á RIFF.

Erlendur útskrifaðist veturinn 2010 úr leikstjórnar og framleiðsludeild Kvikmyndaskóla Íslands og síðan þá hef ég unnið sem freelance kvikmyndagerðarmaður á mörgum sviðum listarinnar.

Ég er búsettur í New York þessa stundina þar sem ég er í Mastersnámi í leikstjórn í Columbia University. Ég er búinn að vera hérna í 1 og hálft ár og er mjög ánægður með námið. Ég er búinn að skrifa handrit í fullri lengd, er að vinna í öðru handriti og er búinn að gera tvær stuttmyndir. Borgin er stórkostleg og hver einasti dagur er ævintýri.

Hugmyndin að myndinni Breathe varð til vegna mínútumyndakeppnar RIFF árið 2013. “Loft” var þemað og áttu keppendur að búa til mínútumynd út frá því.

Mér fannst tilhugsunin við að klippa saman fólk að anda á mismunandi hátt mjög skemmtileg og eiga vel við þemað. Við Oddur Elíasson, framleiðandi myndarinnar, skrifuðum saman lista af leiðum sem fólk andar og það var í raun handritið. Við fengum Smára Snæ Eiríksson á hljóðið, Viggó Hansson á cameruna og fjölskyldu og vini til að leika fyrir okkur.

Erlendur klippti svo myndina á nokkrum dögum og Einar Sverrir Tryggvason tók að sér að semja tónlist og Smári Snær hljóðvann verkið.

Myndin endaði á að vinna keppnina á RIFF og svo ákvað ég að setja hana bara á netið. Hún er búin að vera að malla á Youtube og Vimeo í langan tíma og er komin með rúmlega 40.000 views samanlagt sem er bara frábært fyrir svona litla mynd. Hún fær mann til að brosa og hún er óháð tungumáli sem gerir markhópinn stórann.

Fulltrúar Urban TV hátíðarinnar höfðu samband við Erlend í gegnum Vimeo og hvöttu hann til að sækja um.

Ég ákvað að slá til án þess að kynna mér hátíðina neitt frekar. Það kom mér svo virkilega á óvart þegar þeir höfðu samband við mig nokkrum mánuðum síðar og sögðu að ég hefði unnið og að þau vildu bjóða mér til Madrídar á hátíðna til að taka við verðlaununum. Því miður gat ég ekki verið viðstaddur hátíðina vegna Visa mála en það kemur vonandi annað tækifæri til að fara á hátíð.

Erlendi finnst ótrúlegt hvað lítil og einföld mynd eins og Breathe getur náð langt.

Fólk er ennþá að hafa samband við mig vegna hennar þó svo hún hafi verið gerð 2013. Hún var einhverntíman notuð sem Yoga studio auglýsing í Israel og nú seinast notuð í Tedtalk fyrirlestur.

Ýmis spennandi verkefni bíða Erlends á næstunni og greinilegt að dvölin vestra er honum innblástur.

Ég er að fara að skjóta næstu mynd núna um jólin í Alabama og svo aðra í New York næsta sumar. Það eru spennandi tímar framundan.

Áhugavert verður að fylgjast með næstu verkefnum Erlends ytra en verðlaunamynd hans, Breathe getið þið séð hér.

Erlendur Sveinsson verðlaunaður fyrir Breathe á Urban Tv Festival í Madrid

Viðtal við Óskar Hauks um mynd hans “Að binda banasár”

Erlingur Óttar Thoroddsen er leikstjóri hrollvekjunnar Rökkurs sem frumsýnd verður næsta haust. Hann hefur starfað sem kennari við Kvikmyndaskóla Íslands síðustu ár og við fengum hann til að segja okkur aðeins frá myndinni, störfum sínum og bakgrunni.

Ég byrjaði að taka upp stuttmyndir á VHS-upptökuvél foreldra minna þegar ég var krakki, og þær voru allar einhvers konar hryllingsmyndir þar sem við notuðum mikið af tómatsósu og létum fólk hverfa með því að klippa “in camera” — ýttum á stopp, fengum karakter til að hlaupa í burtu, og byrjuðum svo að taka upp aftur. Þetta voru þungavigtarmyndir á ýmsa vegu.

Erlingur segir að á menntaskólaárunum hafi hann hinsvegar farið að velta alvarlega fyrir sér möguleikanum að verða kvikmyndagerðramaður.

 Ég fór að taka betur eftir ýmsum leikstjórum og stílbrögðum þeirra og hélt sömuleiðis áfram að gera stuttmyndir og þróaði með mér mín eigin stílbrögð.Mig langaði að fara í nám í Bandaríkjunum og komst inn í leikstjórnarnám við Columbia háskóla í New York, og hef verið þar meira og minna síðan. Ég veit ekki alveg hvort ég valdi fagið, eða hvort það valdi mig — það kom eiginlega aldrei neitt annað til greina þegar ég hugsa til baka. Ég hef alltaf haft brennandi áhuga á því að segja sögur, og uppáhaldsfrásagnarformið mitt er kvikmyndalistin.

Erlingur segir það hafa verið lán að fá að kenna nokkra kúrsa við Kvikmyndaskóla Íslands.

 Ég hef kennt nokkra kúrsa í handritagerð, myndræna frásögn, og svo skrif á handriti í fullri lengd. Það hefur verið bæði mjög skemmtilegt og gefandi að fá að kenna við skólann — að vera í herbergi fullu af ástríðufullum nemendum fær mann sjálfan til að vilja fara út og skrifa og taka upp meira, og ég get ekki beðið eftir því að sjá hvað nemendurnir framleiða í framtíðinni.

En hvaðan kom hugmyndin að hrollvekjunni Rökkri og hvað kom til að Erlingur valdi nákvæmlega þá tegund kvikmyndalistarinnar að fast við?

Eins og ég sagði áður, þá er hryllingsmyndin búin að fylgja mér í áraraðir. Ég man eftir því að skoða hulstrin á vídjóleigum, og vera sérstaklega hugfanginn af hryllingsmyndahulstrunum. Ég mátti ekki leigja myndirnar en var búinn að ímynda mér söguþræðina í miklum smáatriðum — þannig að ég var byrjaður að hugsa upp hrollvekjur mjög snemma á lífsleiðinni. Á seinni árum þá hefur það verið blanda af sköpunargleði og ákveðnum pólitískum-og pönk-elementum sem mér finnst vera mest heillandi við hryllingsmyndina. Hryllingsmyndin leyfir manni að gera ýmislegt út fyrir kassann sem maður sér ekki í öðrum kvikmyndagreinum.Og þó svo ég viti ekki alveg nákvæmlega hvar munurinn liggur, þá myndi ég segja að Rökkur sé frekar hrollvekja heldur en hryllingsmynd. Markmiðið var frekar að vekja upp gæsahúð heldur en “hrylling” — en ég kaupi alveg bæði lýsingarorðin.

Rökkur er eins og áður segir hrollvekja en Erlingur bætir við að hún sé með dramatísku ívafi.

Sagan segir af Gunnari og Einari.  Þeir voru par en eru núna hættir saman. Gunnar fær skringilegt símtal frá Einari um miðja nótt, og keyrir út á Snæfellsnes til að finna hann í fjölskyldusumarbústaðnum. Þegar hann mætir á staðinn kemur bráðlega í ljós að ekki er allt sem sýnist …Það voru nokkrir þættir sem spiluðu inn í að Rökkur varð til. Sá fyrsti var að mig langaði að gera mynd á Íslandi sem yrði tiltölulega auðveld og ódýr í framleiðslu (nota bene: það er ekkert auðvelt í kvikmyndagerð, sérstaklega ekki þegar maður vill gera hlutina ódýrt!), svo ég var að velta fyrir mér sögum þar sem væru bara tvær aðalpersónur og ekki mikið fleiri einn aðaltökustaður. Ég hafði fyrir einhverjum misserum byrjað á handriti um skringilega hluti sem gerðust í sumarbústað, en hafði aldrei klárað það, svo skyndilega kom sú hugmynd upp aftur.

Á sama tíma langaði Erlingi að skrifa sögu um sambandsslit og hvernig fólk bregst mismunandi við þegar samband hættir.

Mig langaði líka til þess að gera íslenska kvikmynd sem tók samkynhneigð ástarsambönd alvarlega, því ég hafði í raun og veru ekki séð það gert áður. Þannig að allir þessir hlutir smullu saman á réttum tíma, og handritið að Rökkri byrjaði að verða til.

Erlingur bendir á að það sé hægt að fylgjast með Rökkri á Facebooksíðu myndarinnar  en frumsýningin verður 27. október næstkomandi.

Það er margt spennandi að gerast með Rökkur þess dagana, og besta leiðin til að fylgjast með er á Facebook. Við vorum m.a. að frumsýna nýja “kitlu” (þ.e. teaser) sem ætti að gefa smá hugmynd um hvernig mynd þetta er. Það verða fleiri tilkynningar og sýnishorn á næstu vikum og mánuðum, og svo verður myndin frumsýnd 27. október næstkomandi. Ég held að haustið fari Rökkri vel!Ég er mjög ánægður að sjá gróskuna í óháðri íslenskri kvikmyndagerð, og ég vona að Rökkri verði tekið vel þegar hún kemur út. Við erum öll mjög stolt af henni!

Lán að fá að kenna við Kvikmyndaskóla Íslands – Erlingur Óttar um kennsluna og myndina Rökkur

Dagur de’Medici Ólafsson, útskrifaður úr Skapandi tækni og Daníel Bjarnason, útskrifaður úr Leikstjórn og framleiðslu, eru um þessar mundir í upptökum í Eþíópíu undir framleiðslu Skot Productions. Við náðum tali af Degi og fengum að forvitnast um hvað varð þess valdandi að hann valdi sér framtíð í kvikmyndalist og nánari upplýsingar um verkið sem þeir félagar eru að vinna.

Það sem heillar mig helst við kvikmyndagerð er að það eru engar reglur, að geta sýnt fegurðina í því sem ljótt er og gert það sem fagurt er ljótt. Að geta stjórnað tilfinningum áhorfandans með myndavél, hljóði og klippingu. Til þess horfum við á bíó, til þess að komast í annað ástand, finna aðrar tilfinningar…. Ég vil vera sá sem skapar þær tilfinningar.Þegar ég byrjaði í kvikmyndanámi var markmiðið alltaf að vinna sem tökumaður erlendis sem náttúrutökumaður, heimildartökumaður eða stríðsfréttamyndari. Með tímanum breyttust aðstæður og sá draumur vék fyrir öðrum. En þessi ferða-ævintýra-bóla brennur enn í mér. Við Daníel höfum unnið mikið saman og ferðast erlendis fyrir vinnu áður svo það var ekki nokkur spurning um það hvort að ég tæki þetta erfiða verkefni að mér. Einnig finnst mér frábært að geta verið partur af því að opna Barnaþorp í Eþíópíu.

Dagur og Bjarni eru að vinna saman myndband til að vekja athygli á opnun nýs barnaþorps í Tule Moye fyrir SOS barnaþorpin og eru að upplifa nándina við fátæktina og skortinn sem gerir barnaþorpin svo nauðsynleg og er svo langt frá aðstæðum hér heima á Íslandi.

Það sem kom mér mest á óvart er hvernig fólkið sem við erum að mynda lifir, maður hefur séð myndir og svona frá fátækrasvæðum í Afríku en aldrei hefði mér dottið í hug að ástandið væri svona slæmt. Hefur því ferðin tekið mun meira á andlegu hliðina en þá líkamlegu. Hér eru ótal mæður með 6-12 börn sem að þurfa að vinna á hverjum degi svo að börnin þeirra fái eitthvað að borða, ofast er ekkert til fyrir þær. Hér höfum við hitt börn sem hafa klæðst sömu fötunum í 2-3 ár daglega og eru fötin grá því húsin og umhverfi eru smíðuð úr mold og myndu ekki einu sinni standast skilyrði og reglur um fjós og fjárhús á Íslandi. Hér höfum við verið að keyra framhjá fólki sem gengur 6-10 kílómetra í sinni daglegu vatnsferð sem oft endar með því að þau koma tómhent til baka. Hér eru 90.000 börn á götunni, yfirgefin af foreldrum sínum. Hér deyja fleiri þúsund börn mánaðarlega úr hungri og sýkingum.

Við vonum að myndin minni fólk á það sem það nú þegar veit, að ástandið hérna er hræðilegt og það er fólk eins og ég og þú hérna sem að lifa skelfilegu lífi. Maður gleymir því á Íslandi, skiljanlega getur maður ekki verið að hugsa um hræðilega hluti allan daginn, en mikið vona ég að fólk sjái myndina og styrki verkefnið til þess að SOS geti byggt þetta þorp sem er svo nauðsynlegt. Eftir 2-3 ár förum við svo aftur að skoða framfarirnar á svæðinu.

Þetta er mikilvægt verk sem þeir eru að vinna og vonumst við til að sjá afraksturinn i náinni framtíð, en ef þið hafið áhuga á að styrkja við starfið bendum við á heimasíðu SOS barnaþorpanna

Dagur de’Medici Ólafsson og Daníel Bjarnason eru í Eþíópíu að taka upp fyrir SOS Barnaþorpin

Nemendur Kvikmyndaskólans eru með margar myndir á Frostbiter kvikmyndahátíðinni

Í dag útskrifuðust tíu nemendur við hátíðlega athöfn úr Kvikmyndaskóla Íslands í Bíó Paradís.
Kynnir var Þorsteinn Bachmann en þeir félagar Ásgeir Logi Axelson og Ragnar Ingi Magnússon sem útskrifðust úr Skapandi tækni  fengu verðlaun fyrir bestu myndina. Verðlaunin fengu þeir fyrir mynd sína Himinn og Jörð en það  var ekki eini heiðurinn sem þeim félögum hlotnaðist í dag því þeir hrepptu að auki Bjarkann; verðlaun fyrir bestu mynd.
Bolli Már Bjarnason fékk verðlaun fyrir bestu mynd í leiklistardeild en mynd hans heitir Hvítt framboð. Þá hlaut Knútur Haukstein Ólafsson í leiklistardeild  viðurkenningu fyrir besta námsárangur og ástundun.
Kvikmyndaskóli Íslands óskar öllum útskriftarnemum til hamingju með metnaðarfullar útksriftarmyndir og áfangann í heild.

Tíu nemendur útskrifuðust úr Kvikmyndaskóla Íslands í dag

Niðurstöður leitar